ÇXR Sədri Si Cinpinin Şimali Koreyaya səfəri regionda geosiyasi proseslər baxımından mühüm əhəmiyyət daşıyır. Düşünürəm ki, bu səfərin əsas məqsədi Çin ilə Şimali Koreya arasında strateji tərəfdaşlığı daha da möhkəmləndirmək və iki ölkə arasındakı siyasi əlaqələri yeni mərhələyə daşımaqdır. Son illərdə beynəlxalq münasibətlər sistemində artan gərginlik fonunda Pekin öz ənənəvi müttəfiqləri ilə əlaqələrini gücləndirməyə çalışır və Şimali Koreya bu baxımdan Çin üçün xüsusi əhəmiyyət kəsb edir. Bu səfər eyni zamanda Çinin Koreya yarımadasında təsir imkanlarını qorumaq və mövqeyini möhkəmləndirmək niyyətini nümayiş etdirir. Şimali Koreyanın son dövrlərdə digər ölkələrlə münasibətlərini genişləndirməsi Pekini regiondakı mövqeyini daha da möhkəmləndirməyə sövq edir. Buna görə də Si Cinpinin Pxenyana səfəri iki ölkə arasında qarşılıqlı etimadın artırılmasına və əməkdaşlığın daha da güclənməsinə zəmin yarada bilər. Regional baxımdan görüşdə təhlükəsizlik məsələləri, Koreya yarımadasındakı vəziyyət, iqtisadi əməkdaşlıq və nəqliyyat-logistika əlaqələrinin müzakirə ediləcəyi ehtimal olunur. Bu mövzular üzrə əldə ediləcək razılaşmalar regionda sabitliyin qorunmasına və gələcək siyasi proseslərə müəyyən təsir göstərə bilər. Xüsusilə də Şərqi Asiyada qüvvələr balansının dəyişdiyi bir dövrdə belə təmaslar böyük əhəmiyyət daşıyır. Eyni zamanda, bu səfər Çinin beynəlxalq arenada diplomatik fəallığını artırmaq və regional proseslərdə aparıcı aktorlardan biri olduğunu nümayiş etdirmək baxımından da diqqət çəkir. Si Cinpin həm müttəfiqlərlə əlaqələrin gücləndirilməsinə, həm də Pekinin strateji maraqlarının qorunmasına yönəlmiş siyasətini davam etdirdiyini göstərməyə çalışır. Nəticə etibarilə, Şimali Koreyaya səfər təkcə ikitərəfli münasibətlər baxımından deyil, həm də Asiya-Sakit okean regionunda formalaşan yeni siyasi reallıqlar fonunda Çinin gələcək mövqeyini gücləndirməyə hesablanmış mühüm diplomatik addımlardan biri kimi qiymətləndirilə bilər.
Azərbaycan Universitetinin IV kurs Regionşünaslıq(Avropa ölkələri üzrə) tələbəsi Hacıyeva İlahə
