Azərbaycan, Türkiyə və Gürcüstan xarici işlər nazirlərinin İstanbulda keçirilən 10-cu görüşü regionda əməkdaşlıq və təhlükəsizlik baxımından mühüm əhəmiyyət daşıya bilər. Düşünürəm ki, bu görüşün əsas məqsədlərindən biri üç ölkə arasında siyasi dialoqun və xarici siyasət koordinasiyasının daha da gücləndirilməsi, həmçinin Cənubi Qafqaz və daha geniş regionda baş verən proseslərə ortaq yanaşmanın formalaşdırılmasıdır. Son illərdə regionda geosiyasi dəyişikliklər və təhlükəsizlik çağırışları fonunda bu cür üçtərəfli formatlar daha da aktuallaşıb və bu səbəbdən İstanbulda keçirilən görüş xüsusi diqqət çəkir. Görüş zamanı regional proseslər, təhlükəsizlik məsələləri, enerji təhlükəsizliyinin təmin olunması, eləcə də nəqliyyat və tranzit layihələrinin – xüsusilə Orta Dəhliz və Bakı–Tbilisi–Qars kimi strateji marşrutların inkişafı müzakirə oluna bilər. Eyni zamanda iqtisadi əməkdaşlığın genişləndirilməsi və ticarət əlaqələrinin daha da artırılması da gündəmdə olan əsas istiqamətlərdən biri kimi qiymətləndirilə bilər. Məncə, bu görüşün digər vacib tərəfi üç ölkənin beynəlxalq platformalarda daha koordinasiyalı mövqe sərgiləməsi və regional sabitliyin möhkəmləndirilməsi istiqamətində ortaq addımların müəyyənləşdirilməsidir. Ümumilikdə, İstanbulda keçirilən bu görüş yalnız diplomatik dialoq platforması deyil, həm də regionda uzunmüddətli əməkdaşlıq və strateji tərəfdaşlığın möhkəmləndirilməsi baxımından mühüm bir mərhələ kimi dəyərləndirilə bilər.

Azərbaycan Universitetinin IV kurs Regionşünaslıq(Avropa ölkələri üzrə) tələbəsi Hacıyeva İlahə