ABŞ ilə Avropa İttifaqı uzun illərdir müttəfiq olsalar da, aralarında bəzən müəyyən gərginliklər yaranır. Məncə, bunun əsas səbəbi tərəflərin maraqlarının tam üst-üstə düşməməsidir. Bu gərginlik təkcə bir sahədə deyil, həm iqtisadi, həm siyasi, həm də təhlükəsizlik məsələlərində özünü göstərir. İqtisadi və ticarət məsələləri bu gərginliyin əsas səbəblərindən biridir. ABŞ bəzən Avropa mallarına – məsələn polad və alüminiuma – tariflər tətbiq edir, Aİ isə ABŞ şirkətlərinə cərimələr və məhdudiyyətlər qoyur. Fikrimcə, bu qarşılıqlı addımlar xüsusilə texnologiya və sənaye sahəsində rəqabəti daha da artırır. Eyni zamanda, Aİ-nin ABŞ-ın böyük texnologiya şirkətlərinə qarşı sərt qaydalar tətbiq etməsi də münasibətlərdə narazılıq yaradır. Burada enerji siyasəti də mühüm rol oynayır. ABŞ istəyir ki, Avropa Rusiyadan qaz və neft asılılığını azaltsın, amma bəzi Avropa ölkələri hələ də bu resurslardan istifadə edir. Düşünürəm ki, bu da tərəflər arasında fikir ayrılığı yaradan əsas məsələlərdən biridir. Təhlükəsizlik və müdafiə məsələlərində də fərqli yanaşmalar var. ABŞ tez-tez bildirir ki, Avropa ölkələri NATO çərçivəsində kifayət qədər maliyyə ayırmır və daha çox ABŞ-a güvənir. Digər tərəfdən, Avropa artıq daha müstəqil müdafiə siyasəti yürütmək istəyir. Məncə, bu qarşılıqlı gözləntilər də gərginliyi artırır. Bundan əlavə, xarici siyasətdə də fərqlər var. Çin, İran və Yaxın Şərq məsələlərində ABŞ və Aİ bəzən fərqli strategiyalar seçir. Bu fərqliliklər ortaq qərar verməyi çətinləşdirir. Ümumiyyətlə, mən belə düşünürəm ki, ABŞ və Aİ müttəfiq olsalar da, iqtisadi maraqlar, enerji siyasəti, müdafiə xərcləri və xarici siyasətdəki fərqlər səbəbindən aralarında bəzən gərginlik yaranır. Amma bu, tam qarşıdurma deyil, daha çox maraqların üst-üstə düşməməsi ilə bağlıdır.

Azərbaycan Universitetinin IV kurs Regionşünaslıq(Avropa ölkələri üzrə) tələbəsi Hacıyeva İlahə