Azərbaycan və Türkiyə Türk dünyasının yeni strateji qütbünə çevrilir
Azərbaycan və Türkiyə arasındakı strateji əməkdaşlıq regional maraqlar baxımından diqqət çəkir. Türkiyə Milliyyətçi Hərəkat Partiyasının (MHP) sədri Dövlet Bahçeli partiyasının iclasında bildirib ki, iki ölkənin “bir millət, iki dövlət” prinsipi ilə qurulan münasibətləri bəzi dairələri narahat edir. O, həmçinin Azərbaycan-Ermənistan sülh prosesinə toxunaraq, 8 avqustda Vaşinqtonda imzalanmış bəyannamənin bu prosesə dəstək verəcəyini vurğulayıb. Vətən müharibəsi və Qarabağın işğaldan azad olunması məsələlərinə də toxunan Bahçeli, sülh prosesində atılan addımların müsbət nəticələr doğuracağına inandığını qeyd edib.
Türkiyəli Politoloq, Beynəlxalq siyasət üzrə ekspert İsmail Cingöz Şərq.az-a verdiyi müsahibədə qeyd edib ki:
Türküstan coğrafiyasının və Türk Dövlətləri Təşkilatının iki lokomotiv gücü olan Azərbaycan və Türkiyənin dostluq və qardaşlıq münasibətlərinin, iki ölkə arasında “bir millət, iki dövlət” prinsipi ilə və qardaşlıq duyğuları ilə yürüdülməsinin bəzi tərəfləri narahat etdiyini bildirib:
“İki qardaş ölkə arasına nifaq salmaq, qardaşlıq münasibətlərini pozmağa çalışanların keçmişdə olduğu kimi, bu gün də mövcud olduğu və gələcəkdə də olacağı unudulmamalıdır. Dövlət rəhbərləri başda olmaqla, iki ölkənin qardaş xalqı həqiqətən həm irq, həm soy, həm də din baxımından qardaşdır. Hər iki dövlət araya fitnə salınmasına icazə verməməlidir. Yeni dünya sistemi qurulur və bu sistem çərçivəsində Türkistan coğrafiyası üzərindən qərbə açılım, Azərbaycan və Türkiyə vasitəsilə həyata keçirilir. Eyni zamanda qərbdən də Türkiyə, Zəngəzur, Azərbaycan və Xəzər vasitəsilə Türkistan coğrafiyasına iqtisadi, ticarət və digər əlaqələrin inkişaf etdiyini görürük. Son olaraq, ABŞ Prezidenti Donald Trampın Türk cumhuriyyətlərinin liderlərini ABŞ-da toplaması və müəyyən sazişlər imzalamasını müşahidə etdik. Həmçinin Türkistan coğrafiyasının yeraltı və yerüstü sərvətlərinin zənginliyi və yeni mədənlərin aşkarlanması ilə bu zənginliyin artdığını da görürük”.
Analitik Türküstan coğrafiyasında Türk Dövlətləri Birliyinin qardaşlıq prinsipi ilə bir-birinə sıx bağlı olaraq gələcəyə yön verməsindən narahat olan tərəflərin araya fitnə salmaq istədiyini də söyləyib:
“Yeni dünya sistemində, Türk Dövlətləri Təşkilatının Azərbaycan və Türkiyə lokomotivliyində bir qütb kimi yüksəlmə ehtimalı ortaya çıxıb. Tarix bizə bunu bir missiya olaraq verib. Buna görə də, bu çıxışı fitnə və fesadın qarşısını almaq üçün bir tarixi qeydə çevrilmiş açıqlama kimi qiymətləndirmək lazımdır”.
