NATO-nun keçmiş baş katibi Anders Foq Rasmussen “Quardian”a bildirib ki, Avropa Ukrayna Silahlı Qüvvələrinə dəstək yanaşmasını dəyişməsə, Ukrayna “əbədi müharibə” ilə üzləşə bilər.
“Strategiyamızda ciddi dəyişikliklər etməsək, əbədi müharibə vəziyyətinə düşmək riskimiz var”,- o vurğulayıb.
Bununla əlaqədar Rasmussen Ukrayna üzərində “hava qalxanı” yaratmağı və atəşkəs əldə olunana qədər Avropa qoşunlarının ölkəyə daxil edilməsini təklif edib.
Mövzu ilə bağlı Beynəlxalq Münasibətlər və Diplomatiya Araşdırmaları Mərkəzinin Sədri, Politoloq Samir Hümbətov “İnformator.az”a açıqlamasında bildirib ki, Müharibənin uzanmaması üçün Qərb ölkələri tam dəstək göstərməlidir:
“NATO-nun keçmiş baş katibi Anders Foq Rasmussen təcrübəli bir siyasətçidir. Uzun müddət NATO-da baş katib olub. Baş katib olduğu dövrlərdə əlində olan məlumatlardan hesab edirəm ki, Rasmussenin bu qənaətə gəlməsi təxminən belə bir mənzərə yaradır ki, o Avropanın, NATO-nun, eyni zamanda Rusiyanın da gücünü bilir. Əslində, bildirmək istəyir ki, Rusiyanı sıxışdırmağın yeganə yolu budur. Amma nəzərə almaq lazımdır ki, müharibəni etdirən tərəflər bu müharibənin hələ ki, uzanmasının tərəfdarıdır. Atdıqları addımları da ona görə hesablayırlar. Əgər NATO və yaxud da Avropada olan dövlətlərin qoşunları Ukrayna ərazisinə girsə, bu, müharibəni dayandırmayacaq. Hətta düşünürəm ki, uzun müddətli müharibəyə çevirə bilər. Amma burada bir məsələ də var. Döyüş meydanında Qərb ölkələrinin Ukraynaya verəcəyi dəstəkdən də asılıdır ki, bu, qısa müddətə bitsin. Bunun tam olub-olmayacağı da bir sual doğurur. O baxımdan düşünürəm ki, Avropa dövlətləri, Qərb dövlətləri ortaq qərara gəlməsə, Ukrayna müharibəsi uzanacaq. Amma bir məsələ də var ki, Qərb dövlətləri dəstək versələr, amma bu dəstəyi tam verməsələr, yenə bu müharibə uzanacaq. Ona görə də verilən dəstək tam olmalıdır və ən azından Rusiyanın hücumlarının qarşısını minimuma endirməyi bacarmalıdır. Əks halda, müharibə riski hələ davam edə bilər”.
