“Qəzza zolağına sülhməramlı missiya Azərbaycan üçün faydalı olarsa, nəzərdən keçirilə bilər”

Beynəlxalq Münasibətlər və Diplomatiya Araşdırmaları Mərkəzinin Sədri, Politoloq Samir Hümbətov Şərq.az-a açıqlamasında deyib: 

Əgər Qəzza zolağına təhlükəsizlik məqsədi ilə sülhməramlı missiya göndəriləcəksə, bu missiya orada yekun sülhün təmin olunmasına, təhlükəsizliyin bərpasına və hər iki tərəfə fayda verməyə xidmət edəcəksə, Azərbaycan dövləti bu məsələni nəzərdən keçirə bilər:

“Təbii ki, yekun qərar bütün müzakirələr aparıldıqdan, risklər, üstünlüklər və çatışmazlıqlar tam şəkildə qiymətləndirildikdən sonra veriləcəkdir.

Eyni zamanda burada Azərbaycan dövlətinin milli maraqları məsələsi də əsas yer tutur. Azərbaycan dövlətinin maraqları nəyi tələb edəcəksə, qərar da məhz ona uyğun şəkildə veriləcək”.

Ekspert ABŞ-nin bu təklifi irəli sürməsinin Azərbaycana olan etimaddan və rəsmi Bakının beynəlxalq təhlükəsizliyə verdiyi töhfədən irəli gəldiyini qeyd edib:

“Buna görə Azərbaycan dövlətinin bu məsələyə BMT Təhlükəsizlik Şurasının qətnamələrinə əsaslanaraq baxması və münasibət bildirməsi tamamilə beynəlxalq hüquqa söykənən bir addımdır. Əgər Azərbaycanın milli maraqları da beynəlxalq hüququn bu istiqaməti ilə üst-üstə düşürsə, bu halda qərarın həmin çərçivədə dəyərləndirilməsi tam məntiqlidir”.