“Avropa İttifaqı Ukrayna ilə bağlı məsələdə yekdil qərar qəbul etməkdə çətinlik çəkir. Bunun səbəbi odur ki, Aİ daxilində həm Rusiyaya, həm də Ukraynaya münasibətdə loyal olan dövlətlər var.”

Bunu Beynəlxalq Münasibətlər və Diplomatiya Araşdırmaları Mərkəzinin sədri, politoloq Samir Hümbətov Bakıvaxtı.az-a açıqlamasında bildirib.

Onun sözlərinə görə, Avropa İttifaqı Rusiya–Ukrayna müharibəsində daxili parçalanma yaşayır.

“Bəzi Avropa ölkələri ABŞ-Rusiya danışıqlarına ümid edirdi. Lakin Donald Tramp və Vladimir Putin arasında Budapeştdə keçirilməsi planlaşdırılan görüş baş tutmadı. Verilən bəyanatlar da görüşün olmayacağını göstərdi.”

Politoloq qeyd edib ki, nə Rusiya, nə də Ukrayna müharibəni dayandırmaq niyyətində deyil.

“Putinin sözçüsü Dmitri Peskovun açıqlamalarından da aydın olur ki, Moskva atəşkəsə razı deyil. Rusiya hesab edir ki, müharibəni dayandırarsa, strateji hədəflərinə çata bilməyəcək. Əks halda, Ukrayna toparlanacaq və Qərb ölkələri onu daha çox silahlandıracaq.”

Samir Hümbətov əlavə edib ki, ABŞ-ın mövqeyi fərqlidir.

“Tramp müharibənin dayanmasını istəsə də, ABŞ-ın “dərin dövləti” bunu istəmir. Çünki müharibənin uzanması onların maraqlarına uyğundur. ABŞ bu vəziyyətdən istifadə edərək digər regionlarda öz mövqelərini möhkəmləndirməyə çalışır.”