Beynəlxalq Münasibətlər və Diplomatiya Araşdırmaları Mərkəzinin Sədri, Politoloq Samir Hümbətov Xalqcəbhəsi.az-a müsahibəsində qeyd edib:

“Əgər İsrail və İran arasında hansısa bir rəsmi sənəd yoxdursa, atəşkəs rejimidirsə, əlbəttə ki, tərəflər arasında yeni bir müharibənin olma ehtimalı çoxdur. Bunu İran tərəfi başa düşür. Mən birinci qarşıdurmada, yəni 12 günlük müharibədə də qeyd etmişdim ki, İsrail və İran arasında bu müharibə ilk mərhələdir və əslində nəbz yoxlamasıdır. Yəni tərəflər bir-birinin nəbzini yoxlayır ki, onların hansı hissədə boşluqları var”.

Politoloq qeyd edib ki, ikinci müharibə daha dağıdıcı və daha ağır ola bilər: “Birinci baş verən müharibədə ABŞ B-52 bombardman təyyarəsi ilə Natanzı vurdu və onun üçün müharibəni dayandırdılar. Amma mən düşünürəm ki, qarşıdurma yekunlaşmayıb, nə qədər ki, İranda rejim çökməyib İsrail ondan əl çəkməyəcək. Yəni qarşılıqlı şəkildə bir-birini tamamilə məhv etməklə bağlı həm İrandan İsrailə, həm də İsraildən İrandakı rejimə qarşı fikirlər tez-tez səslənir. Ona görə də mən düşünürəm ki, qarşıdakı dövrdə müharibənin olma ehtimalı var və sadəcə olaraq arada bir fasilənin olmasında məqsəd gələcək üçün taktiki cəhətdən özlərinə uyğun variantları seçib, onu tətbiq etməkdir. Onun üçün də düşünürəm ki, müharibə hər an hər vəziyyətdə başlaya bilər. Necə ki, birinci müharibə başladığı kimi”.